Uprava za statistiku Monstat upozorava građane da mogu biti kažnjeni 100-500 eura ako snimaju ili fotografišu intervju sa popisivačem, kako i popisni upitnik. Isto tolika je kazna za popisivača koji ne vrši popis kako treba.
Kako bi se izbjeglo duplo popisivanje lica, iz Monstata savjetuju građane da se popišu u mjestu u kojem uobičajeno provode dan,a da obavijeste širu rodbinu kako ne bi došlo do dupliranja.
Iz Monstata objašnjavaju da duplikat Upitnika koji ostaje u popisanom domaćinstvu se ne može koristiti u svrhe ostvarivanja bilo kojeg prava niti nametanja bilo kakve obaveze građanima. Takođe, prikupljeni podaci su službena tajna i koristiće se samo u statističke svrhe, piše rtcg.me.
“Zakon o popisu članom 35 Kaznene odredbe za fizičko lice, precizira: Novčanom kaznom u iznosu od 100 eura do 500 eura kazniti za prekršaj fizičko lice, ako zloupotrijebi postupak popisivanja i prisustvo popisivača na način što snima ili fotografiše tok intervjua ili popunjene popisne upitnike ili ako snimak ili fotografiju javno objavi putem interneta ili medija”, navodi se u saopštenju.
Upozoravaju da će Uprava za statistiku po saznanju bilo koju nepropisnu objavu podataka iz popisnih upitnika procesuirati Sudu za prekršaje.
Zakon o popisu član 34 Kaznene odredbe za popisivače, instruktore i kontrolore, precizira da će se novčanom kaznom 100 – 500 eura, kazniti za prekršaj popisivač, instruktor, kontrolor i drugo lice koje vrši poslove u vezi s popisom, ako blagovremeno i na propisan način ne vrši poslove u vezi sa popisom.
“S tim u vezi, sve nepravilnosti koje se odnose na postupanje suprotno Uputstvu za popisivanje podliježu pokretanju prekršajnog postupka. U tom smislu upitnici se popunjavaju isključivo hemijskom olovkom po pravilu dobijenom od strane Uprave za statistiku. Upotreba bilo kojih drugih olovaka, posebno „piši briši“, kažnjivo je shodno pomenutom članu zakona”, upozoravaju iz Monstata.
Iz Uprave takođe objašnjavaju da je osnovni cilj popisa da se utvrdi tačan broj osoba koje žive i koriste infrastrukturu nekog geografskog područja.
“S tim u vezi, važno je istaći da mjesto popisivanja ne mora uvijek da bude i mjesto prebivališta lica tj. adresa na kojoj je lice prijavljeno prema ličnim dokumentima. Kako bi se izbjeglo duplo popisivanje lica, neophodno je da se lice popiše u onom mjestu u kojem uobičajeno provodi dan”, kažu iz Monstata.
U tom smislu, molie građane da komuniciraju sa članovima šire porodice da će se popisati u mjestu u kojem zaista borave.
