Bivša poslanica Snežana Jonica ističe da ni nakon velikih najava o promjenama nakon 2020. godine i dalje nemamo zakone o Vladi i Skupštini. Iako se na njima nešto uradilo, smatra da ni ova vlast, kao i bivši 30-godišnji režim ne želi da svoj način funkcionisanja ograniči zakonom.
Kako je kazala gostujući u Jutarnjem programu TVCG, inicijativu za izglasavanje ova dva zakona pokrenula je još 2007. i godinama se od strane opozicije ponavljala ta priča, ali sada kada je ta opozicija došla na vlast, nije se uradilo mnogo.
“Formirana je radna grupa u prošlom sazivu Skupštine povodom izrade nacrta zakona o Skupštini, ali nikakav proizvod već dvije godine nemamo. Što se tiče Zakona o vladi, 43. vlada je najavila rad na tom zakonu, radilo se na njemu, vrlo netransparentno po mom mišljenju, tako da jeste napravljen neki nacrt i poslat je Venecijanskoj komisiji. U odnosnu na nacrt koji sam ja vidjela, čini mi se da je verzija koja je otišla Komisiji drugačija, odnosno da je dorađivana, kako bi se crtali limiti budućoj vladi”, naglašava Jonica.
